BRUKSEL – Bashkimi Evropian dhe Shtetet e Bashkuara të Amerikës kanë arritur një marrëveshje kornizë, në bazë të së cilës do të fillojë zvogëlimi i subvencioneve për bujqësinë, njofton Brukseli zyrtar. Sipas zëdhënësit të BE-së në Bruksel, z. Eric Marmer, pas këshillimeve paraprake në kryeqytetet e BE-së kjo marrëveshje do t’i paraqitet Organizates Tregtare Botërore (WTO) në Gjenevë. Marmer nuk u prononcua fare rreth përmbajtjes së këtij dokumenti, mirëpo vlerësoi se nuk është fjala për një marrëveshje definitive, por vetëm për krijimin e bazës për diskutim.
Subvencionet për bujqësinë dhe tarifat doganore për produktet bujqësore janë pikat kryesore në mosëmarrveshjet e shteteve perëndimore, sa i përket liberalizimit të tregtisë botërore. Vendet në zhvillim kërkojnë vazhdimisht mënjanimin e këtyre barrierave, të cilat atyre u vështirësojnë çasjen në tregjet perëndimore. Mirëpo, vendet e industrializuara nuk janë ende të gatshme për një hap të tillë, edhe pse brenda vet këtyre shteteve ekzistojnë mendime të kundërta për këtë problematikë. ShBA-të janë të interesuara të bëjnë kufizimin e të gjitha doganave në 25 për qind. Ndërsa, vendet e Bashkimit Evropian kanë interes që doganat të jenë shumë më të larta dhe të arrijnë vlerat
deri në 36 për qind.
Kompromisin që është arritur tash, Mamer e ka përshkruar si “test kornizë me disa detaje në vete”. Sakaq, WTO-ja ka ftuar ShBA-të dhe BE-në pë raundin e ri të bisedimeve, pasiqë kjo marrëveshje krijon kushtet për fillimin e një procesi konkret të bisedimeve. Konferenca e ardhshme e WTO-së pritet të mbahet kah mesi i shtatorit në Cancun të Meksikës.
ECIKS (K.D.)
