PRISHTINË – Pas shumë zvarritjeve që arsyetoheshin me pamundësinë e nënshkrimit të kontratës, fluturimi i parë i “Kosova Airlines” i paraparë për 15 qershor, pritet të bëhet në fund të tetorit të këtij viti. Këtë lajm e kanë konfirmuar zyrtarët e Shtyllës së Katërt të UNMIK-ut, të Ministrisë së Transporteve dhe Telekomunikacionit si dhe aksionari i kompanisë fituese të tenderit “Hamburg International”, z. Remzi Ejupi.
Përfaqësuesit e Ministrisë së Transporteve deklaruan pas takimit të përbashkët të së mërkurës, se kompanisë “Hamburg International” nuk do t’i përcaktohet ndonjë datë e veçantë për fillimin e fluturimeve, por asaj do t’i ofrohen kushtet që kjo të bëhet sa më parë. Në ndërkohë Shtylla e Katërt i ka dorëzuar fituesit të tenderit kontratën për vlerësim dhe nëse nuk do të ketë vërejtje të mëdha, pritet që ajo të nënshkruhet në fillim të shtatorit.
Aeroplani i parë i “Kosova Airlines” pritet të fluturojë me fillimin e sezonës dimërore, me datën 28 tetor. Fluturimi i parë do të bëhet për në Zvicër, ndërsa linjat tjera do të vendosen gradualisht. Pronari i “Eurokohës” dhe njëherësh njëri ndër aksionarët kryesor të “Kosova Airlines” ka paralajmëruar mundësinë që në bashkëpunim me Aeroportin e Tiranës së shpejti të vendosen edhe linjat përtej Atlantikut, për në Shtetet e Bashkuara të Amerikës.
Me fillimin e fluturimeve të kompanisë së parë kosovare “Kosova Airlines” pritet që çmimet e transportit të udhëtarëve dhe të mallrave përmes ajrit të zvogëlohen dukshëm në krahasim me nivelin aktual.
ECIKS (K. D.)
