AL
DE
Zyrtari për çështjet e Kosovës në Komisionin Evropian, Khaldoun Sinno, gjatë qëndrimit në Prizren ka theksuar se përurimi i vendkalimit kufitar tregon mbështetjen e BE-së për Kosovën
Prizren, 18 korrik 2007 – Autoritetet e pushtetit lokal dhe qendror dhe ata të administratës ndërkombëtare, të shoqëruar nga përfaqësuesit e Komisionit Evropian, të mërkurën kanë përuruar objektin e vendkalimit kufitar në Vërmicë. Me këtë rast, zyrtarët e lartë janë shprehur se realizimi i këtij projekti i plotëson kriteret evropiane në masë të madhe sa i përket menaxhimit të kufijve.
Sipas numrit dy të UNMIK-ut, Steven Schook, qëllimi i vizitës ka qenë shprehja e mirënjohjes ndaj Agjencisë Evropiane për Rindërtim, për punën që kanë bërë në përmirësimin e infrastrukturës doganore dhe
kufitare.
“Ne kemi ardhur këtu që ta falënderojmë Agjencinë Evropiane për Rindërtim, e cili po bën një punë të madhe dhe ka bërë disa objekte që janë ndër më të mirat në rajon, sa u përket pikave doganore dhe kufitare. Ju duhet të jeni mirënjohës për punën që e kanë bërë ata. Kanë bërë një punë me të cilën këto objekte i plotësojnë deri në 95 për qind standardet evropiane”, është shprehur zëvendësadministratori i Kosovës, derisa së bashku me delegacionin po vizitonin objektet e trashëgimisë kulturore në Prizren.
Ndërsa zyrtari për çështjet e Kosovës në Komisionin Evropian, Khaldoun Sinno, gjatë qëndrimit në Prizren ka theksuar se përurimi i vendkalimit kufitar tregon mbështetjen e BE-së për Kosovën në këtë moment. Sipas tij, projekti i vendkalimit kufitar dërgon tri porosi kryesore, që forcon mbështetjen e BE-së, bashkëpunimin rajonal dhe implementimin e standardeve evropiane. Duke sqaruar porosinë e parë, Sinno ka potencuar se deri më tani BE-ja ka ndihmuar Kosovën me mbi një miliard euro, ndërkohë që asistenca si pjesë e instrumentit parahyrës në BE do të vazhdojë edhe në të ardhmen me 200 milionë eurot e siguruara për tre vjetët e ardhshëm.
“Projektet e tilla tregojnë edhe rëndësinë e bashkëpunimit rajonal, dhe sa i rëndësishëm është ai për qarkullimin më të efektshëm të mallrave, njerëzve dhe kapitalit. Ekonomia e Kosovës do të zhvillohet dhe do të përfitojë nga kjo”, ka deklaruar zyrtari evropian.
Në fund, ai ka përsëritur se implementimi i standardeve evropiane në Kosovë, po ashtu është një sferë ku BE-ja kontribuon.
“Këtë e bëjmë në baza të përhershme me administratën e Kosovës, me dialog teknik dhe asistencë në shumë sektorë, duke filluar nga menaxhimi i kufijve, prokurimi publik e deri te sektori i drejtësisë. Kjo tregon se BE-ja është këtu dhe këtu do të mbesë”, ka thënë Sinno.
Ndërkaq, kryetari i Komunës së Prizrenit, Eqrem Kryeziu, është shprehur i kënaqur që vendkalimi kufitar është ndërtuar në përputhje me standardet e larta evropiane. Krahas kësaj, ai u ka mundësuar mysafirëve që të njihen me atmosferën e qytetit në Prizren, duke i shoqëruar për vizitë në Kishën e Zonjës Ndihmëtare, Kishën e Shën Gjergjit, Xhaminë e Sinan Pashës dhe sheshin “Shatërvan”.
Koha Ditore