KEK-u ua ka bërë terr biznesmenëve turq, pikërisht në kohën kur ata diskutonin mundësitë e investimeve në sektorin e energjisë në Kosovë. Madje ky moment ka qenë më bindës për nevojën e investimeve në energjetikën kosovare se fjala që mbajti kryeministri Hashim Thaçi të martën në holen “Grand”, gjatë takimit të komunitetit të biznesit nga Turqia dhe nga Kosova.
Edhe ministri i Punëve të Jashtme i Turqisë, Ali Babacan, ka premtuar se Turqia do të bëjë investime direkte në Kosovë. “Kosova ka resurse të mëdha natyrore dhe ky është potencial i mirë për investime”, ka thënë Babacan.
Prioritet për investime mbetet energjia elektrike, telekomunikacioni dhe bujqësia. Kryeministri i Kosovës, Hashim Thaçi, ka kërkuar nga biznesmenët që të dalin me projekte konkrete për zhvillimin ekonomik të vendit. “Kemi krijuar një ambient ku investitorët e huaj do të jenë të barabartë me ata vendës”, ka pohuar Thaçi dhe si lëvizje pozitive ka përmendur uljen e tatimit në fitimin e korporatave nga 20 në 10 për qind.
Sipas tij, Turqia vazhdon të jetë mbështetësi kryesor i Kosovës si në aspektin politik ashtu edhe në atë ekonomik. Kosova është shtet i ri, me spektër të gjerë të nevojave për zhvillim.
Faik Yavuz, nënkryetar i Unionit të Odave Ekonomike të Turqisë, tha se këto dy vende kanë një këmbim të mirë tregtar dhe kanë nisur investimet e kompanive turke në Kosovë. Këtu afarojnë 12 biznese me kapital turk, ndërsa Turqia eksporton mallra në vlerë mbi 180 milionë euro në vit, derisa importon vetëm rreth 2 milionë euro në vit. “Ne premtojmë ndihmën e bankave turke përmes kredive më të volitshme”, ka premtuar Yavuz.
Ndërkaq, kryetari i Odës Ekonomike të Kosovës, Besim Beqaj, ka shprehur optimizmin për të ardhmen e ekonomisë së Kosovës, ndonëse duhet një bashkëpunim thelbësor me jashtë. “Të gjitha sektorët kanë mundësi për zhvillim, bazuar në fuqinë e re dhe relativisht mirë të edukuar”, ka thënë Beqaj.
Me këshill biznesi
Të martën është nënshkruar marrëveshja për themelimin e Këshillit Biznesor kosovaro-turk dhe marrëveshje bashkëpunimi ndërmjet Odës Ekonomike të Kosovës dhe Unionit të Odave Ekonomike të Turqisë.
Me këto marrëveshje, sipas zyrtarëve të OEK-ut, hapet rruga e bashkëpunimit më të mirë mes Kosovës dhe Turqisë në aspektin ekonomik. Objektiv kryesor i Këshillit Biznesor kosovaro-turk do të jetë përmirësimi i ambientit për tregti dhe investime në Kosovë.
Gazeta Express
