Komiteti drejtues për ndërtimin e Termocentralit “Kosova e Re” ka zgjedhur katër konsorciume ndërkombëtare, të cilat i kanë përmbushur kriteret për ndërtimin e këtij termocentrali.
Në këtë projekt kishin shprehur interesim 6 konsorciume ndërkombëtare, por dy prej tyre nuk i kanë plotësuar kriteret.
Konsorciumi Adani Power – PT Adani Global nga India dhe Indonezia; konsorciumi AES Electric lid – Demir Export A.S nga SHBA-të dhe Turqia; Park Holding nga Turqia dhe konsorciumi PPC- Contour Global LLP nga Greqia dhe Britania, janë ofertuesit e kualifikuar për ndërtimin e termocentralit “Kosova e Re”.
Ministrja e Energjisë dhe Minierave, Justina Shiroka Pula, e cila drejton komitetin për ndërtimin e termocentralit të ri, tha se Qeveria është shumë e kënaqur me interesimin e këtyre kompanive.
Ajo theksoi se deri në fund të prillit pritet të nxirret drafti i tenderit, kurse deri në korrik do të përfundojnë të gjitha negociatat për përzgjedhjen e kompanisë që do të ndërtojë termocentralin.
Ndërtimi i termocentralit “Kosova e Re” pritet që të fillojë në vitin 2011.
Termocentrali parashihet t’i ketë fillimisht 500 megavate, me mundësi të shtimit edhe të 500 megavateve të tjera. Kostoja e ndërtimit llogaritet të shkojë deri në një miliard euro, shumë kjo që do të bashkëfinancohet nga Qeveria dhe kompania fituese.
ECIKS
