Komunikatë për shtyp
Nisma Ekonomike për Kosovën
Vjenë, 22 mars 2004
ECIKS dënon dhunën në Kosovë
Nisma Ekonomike për Kosovën (ECIKS) dënon ashpër dhunën e ditëve të fundit në Kosovë. Dhuna ndëretnike dhe sulmet ndaj monumenteve fetare si në Kosovë, ashtu edhe në Serbi janë të papranueshme dhe të dënueshme.
ECIKS u shpreh ngushëllimet e veta më të thella të gjitha familjeve të viktimave.
Dhuna e manifestuar dhe sulmet ndaj KFOR-it, SHPK-së dhe policisë së UNMIK-ut i bëjnë dëm interesave të Kosovës dhe janë në kundërshtim të plotë me aspiratat e popullit të Kosovës.
Ngjarjet e ditëve të kaluara dëmtojnë rëndë edhe ekonominë kosovare dhe marrdhëniet ekonomike të Kosovës me botën e jashtme.
Nisma Ekonomike për Kosovën konsideron se gjendja e rëndë ekonomike dhe sociale, si dhe zhagitja e zgjidhjes përfundimtare të statusit të Kosovës janë disa prej arsyeve kryesore të shpërthimit të dhunës në Kosovë. Pa zgjidhje te statusit përfundimtar nuk mund të ketë zhvillim të mirëfilltë ekonomik e social, por as stabilitet politik.
ECIKS çmon lart angazhimet e institucioneve kosovare, posaçërisht të Qeverisë së Kosovës në ndaljen e dhunës dhe stabilizimin e situatës. Krijimi i fondit nga ana e Qeverisë së Kosovës dhe ndarja e shpejtë e mjeteve për riparimin dhe rindërtimin e menjëhershëm të objekteve të djegura gjatë ditëve të kaluara dëshmon përcaktimin e njëmendtë të saj për tejkalimin e krizës.
ECIKS poashtu vlerëson lart kontributin e bashkësisë ndërkombëtare për rikthimin e qetësisë në Kosovë dhe përkushtimin e saj afatgjatë për të ardhmen e Kosovës.
Mediave vendore dhe ndërkombëtare ju bëjmë ftesë që t’i përmbahen etikës gazetareske dhe t’i kontribuojnë stabilizimit të gjendjes përmes raportimeve korrekte e të paanshme.
Investitorët potencial i ftojmë që të mos e humbin besimin në të ardhmën e Kosovës dhe të mos tërhiqen nga ky vend.
ECIKS
