Në Fushë-Kosovë është hapur të enjten fabrika e miellit “Universal Food”, një investim ky kosovaro-turk. Ky investim është konsideruar një mundësi e mirë për bujqit.
Ministri i Bujqësisë Pylltarisë dhe Zhvillimit Rural, Blerand Stavileci tha se investimet e ngjashme si kjo e investitorëve turq hapin perspektiva të ndryshme.
“Kjo fabrikë i plotëson të gjitha standardet është një nga investimet që i gëzon edhe fermerët. Sektori i drithërave mbështetet nga Ministria e Bujqësisë dhe kjo fabrikë hap edhe perspektiva të re për prodhuesit e drithërave të kësaj ane”, tha Stavileci.
Ndërsa, Bahader Aksoy, bashkëpronar në fabrikën “Universal Food”, tha se ky objekt është privatizuar para tre vitesh dhe deri më tani, numri i të punësuarve sillet rreth 260 punëtorë.
“Investimi ka ardhur si rezultat i një bashkëpunimi të mirëfilltë që kemi ndërtuar me shtetin e Kosovës, i cili ka për qëllim edhe mbështetjen e krijimit të ortakërive në mes të afaristëve të dy shteteve tona”, tha Aksoy.
