Tiranë — Kryeministri i vendit, Sali Berisha, ka konkretizuar më shumë idenë e ndërtimit të një centrali bërthamor për prodhimin e energjisë elektrike, duke u bërë thirrje vendeve të rajonit të bashkohen me qëndrimin e tij. Dita e dytë e forumit Krans Montana ka nisur dje me fjalën e kryeministrit Berisha, i cili pasi përmendi rritjen ekonomike të vendit dhe mundësitë që ofron për investime të huaja si rrjedhojë e lehtësive fiskale, u përqendrua te projekti gjigant i ndërtimit të centralit bërthamor.
“Jemi të hapur për centralet bërthamore dhe po bashkëpunojmë me Agjencinë Ndërkombëtare të Energjisë Atomike me qendër në Vjenë”, tha Berisha. Duke e parë si mundësi të madhe për sigurimin e energjisë elektrike, jo vetëm për konsumin e brendshëm, por edhe për eksport drejt vendeve që kanë nevojë, kreu i qeverisë shqiptare paraqiti arsyet ose më saktë avantazhet që sjell kjo vepër nukleare.
Gazeta Express
