Autostrada Vërmicë-Merdar që lidh Kosovën në jug me Shqipërinë dhe në veri me Serbinë ka filluar të ndërtohet, me një ceremoni simbolike të fillimit të punimeve, që u mbajt në fshatin kufitar Vërmicë, prej ku nisën punimet.
Në këtë ceremoni merrnin pjesë, kryeministrat e Kosovës dhe Shqipërisë, Hashim Thaçi dhe Sali Berisha, presidenti Fatmir Sejdiu, ambasadorë të vendeve të jashtme si dhe shumë personalitete të larta vendore dhe ndërkombëtare.
Punëkryes i këtij projekti është konsorciumi amerikan-turk, “Bechtel-Enka”, ndërsa vlera e kontratës është 700 milionë euro.
Ndërtimi i pjesës kosovare të autostradës u vlerësua si projekti më i madh i Kosovës, pas shpalljes së pavarësisë, pasi që e lidh Kosovën në jug me autostradën Durrës-Vërmicë dhe Detin Adriatik.
Kryeministri i Kosovës, Hashim Thaçi, tha së nisja e rrugës së kombit nuk do të ndodhte pa lirinë e Kosovës dhe ky është një sinjal për realizimin e projekteve edhe më të mëdha.
Nga ana tjetër, kryeministri i Shqipërisë, Sali Berisha, tha së fillimi i ndërtimit të kësaj rruge dëshmon së çfarë mund të bëjnë shqiptarët në liri.
Autostrada do të ndërtohet segment për segment. Për fillim do të ndërtohen vetëm dy segmentet e para, që përfshijnë pjesën deri në Qafë të Duhlës. Pjesa tjetër e trasesë do të presë derisa të përgatitet projekti përfundimtar. Financimi i segmenteve të para do të bëhet nga buxheti i Kosovës dhe nuk guxon ta kalojë shumën 120 milionë euro.
