Ditën kur skadoi afati për pagesën e hotelit “Grand” dhe “Iliria”, shpërbëhet blerësi i përkohshëm – “LTD Makos”. Nga ky subjekt kanë lindur “Makos – Grand” dhe “Makos – Iliria”, të cilat janë regjistruar në Zyrën e regjistrimit të bizneseve me lejen e kreut të privatizimit në AKM, Kirg Adams
YLLI KALOSHI
Askush në policinë e UNMIK-ut dhe të SHPK-së, dhe as në Agjencinë Kosovare të Mirëbesimit, nuk ka dhënë ndonjë informatë se a janë të vërteta pohimet e konzorciumit “Makos”, blerësit të hotelit “Grand”, se tërheqja e tyre nga privatizimi i kësaj ndërmarrjeje shoqërore është bërë për shkak të kërcënimeve. Ekrem Tahiri, zëdhënës i AKM, tha se janë organet e drejtësisë ato që do t’i vërtetojnë thëniet e blerësit. Në SHPK, zëdhënësi Agron Borovci thotë shkurt së policia është duke e hetuar rastin.
Por, burime të “Lajmit” thonë se ekziston mundësia e mosmarrëveshjeve në mes themeluesve të “LTD Makos”, e cila e fitoi tenderin për dy hotelet. Sipas dokumentacioneve të siguruara nga gazeta , shihet se “LTD Makos” ka ndryshuar listën e themeluesve të saj më 22 të këtij muaji. Pikërisht kjo datë shënon 20 ditë që nga shpallja e fituesit dhe afatin e fundit për t’i paguar paratë për dy hotelet.
“LTD Makos” është regjistruar në Zyrën e Regjistrimit të Bizneseve në MTI, më datën 7 shkurt të këtij viti, ndërsa themelues të saj ishin: Nexhmi Rexha, Nail Reshidi, Gazmend Abrashi, Habib Jakupi, Jashar Fazliu, Taip Fikri dhe Hotel “Metropol” nga Ohri i Maqedonisë. Të parët në kompani kanë futur kapital nga 816 euro, ndërsa “Metropoli” – 5 mijë e 100 euro, kurse totali i kapitalit themelues të kësaj firme kapte shumën 10 mijë euro.
Në ndërkohë ndryshon marrëveshja. Nga firma “LTD Makos” krijohen dy të tjera: “Makos – Iliria” dhe “Makos – Grand”. Aplikimi për regjistrim është bërë më 17 mars, ndërsa më datë 22 ato evidentohen në librat e Zyrës për Regjistrimin e Bizneseve. Subjekti i ri “Makos – Grand” ka kapital 2 mijë e 500 euro, ndërsa themelues janë: Hoteli “Metropol”, Habib Jakupi, Nail Reshidi dhe Gazmend Abrashi, i cili caktohet personi i autorizuar. Me kapital të njëjtë regjistrohet edhe “Makos – Iliria”, me themeluesit hotelin “Metropol”, Jashar Fazliun, Habib Jakupin, Gazmend Abrashin, Taip Fikriun , kurse personi i autorizuar është Nail Reshidi.
Bashkëthemeluesi i LTD Metropol, Nexhmi Rexha, nuk figuron te asnjëri prej këtyre dy subjekteve. Është interesante fakti se kapitali i krijimit të këtyre dy subjekteve është përafërsisht sa pjesëmarrja e Metropolit të Ohrit në subjektin pjesëmarrës në tender, Makos LTD.
Asnjë nga këta themelues nuk ka pasur qasje në telefon të premten.
Shefi i Zyrës së Regjistrimit, Haxhi Rama, tha se regjistrimi është bërë sipas procedurave dhe pas konsultimeve me AKM-në. Ai nuk tregoi se cili zyrtar në AKM ka lejuar regjistrimin e këtyre subjekteve, të cilat gjatë kohës së zhvillimit të procedurave të tenderit të AKM-së fare nuk kanë ekzistuar. “Lajm” ka siguruar një shkresë të nënshkruar nga drejtori i Departamentit të Privatizimit, Kirg Adams, i cili e lejon këtë regjistrim.
“AKM-ja mendon se nuk ka ndonjë pengesë nga “Makos LTD” që të krijohen këto dy subjekte të reja”, shkruan Adams.
Ai ka thënë se AKM-ja do të vazhdojë procesin e privatizimit të “Grandit” dhe “Ilirisë” me subjektet e reja.
Zëdhënësi i AKM-së, Ekrem Tahiri, tha se nuk ka njohuri për këtë ripozicionim të ofertuesit për dy hotelet e kryeqendrës. Ndërkaq zëvendësdrejtori Ahmet Shala tha shkurt se kjo është lejuar nga AKM-ja, pasi, sipas tij, nuk bie në kundërshtim me rregullat e privatizimit.
Pas këtij ndryshimi të themeluesve të konzorciumit “Makos LTD” dhe krijimit të dy subjekteve të reja, ka ndodhur tërheqja e “Makos – Grandit” nga tenderi, ndërkaq ka mbetur ende në lojë “Makos – Iliria”.
Nuk është hera e parë që AKM-ja lejon ndryshimin e themeluesve të konzorciumeve që fitojnë tenderët e privatizimit. Kjo ishte lejuar edhe me rastin e shitjes së “Ferronikelit”.
Nuk ka para as për “Ilirinë”
Blerësi i përkohshëm i hotelit Iliria, “Makos Iliria”, nuk e ka kryer pagesën të premten, në ditën e fundit të afatit 20- ditësh që i ka caktuar AKM-ja. Zëdhënësi i AKM-së, Ekrem Tahiri, tha se nuk ka ndonjë informatë se janë dhënë paratë, por ai tha se AKM-ja do të presë edhe 3 ditë.
“Në rast se pagesa bëhet nga jashtë Kosovës, atëherë transferi merr kohë 2-3 ditë. Kështu që ne po presim nëse ka ndodhur një gjë e tillë”.
Ai tha se do të kërkohen dëshmi nëse është bërë pagesa në konton e AKM-së më datë 24.
Shabani: Shkelet rregullorja e AKM-së
Kreu i Bashkimit të Sindikatave të Pavarura të Kosovës, Bahri Shabani, dhe anëtar i Bordit të AKM-së, i pyetur për ndryshimin e konzorciumit “Makos LTD” dhe për vazhdimin e procesit të privatizimit me subjektet e reja, tha: “Makos – Grand” dhe “Makos – Iliria”, të cilat nuk kanë marrë pjesë në tenderin, thotë se kjo është në kundërshtim me rregulloren e AKM-së.
“Çdo ndryshim i aksionarëve të blerësit të shpallur me tender është i palejueshëm. Bordi nuk ka marrë vendim për këtë, ndërsa ndryshime mund të bëjë vetëm ai dhe askush tjetër”, tha Shabani.
Ai tha se nuk është hera e parë që AKM-ja bënë tolerime të tilla.
Marrë nga Gazeta Lajm 24 mars 2006
